المساعد الشخصي الرقمي

مشاهدة النسخة كاملة : تدرين أصدق حب يطلع من الجوف


نعيمه
02-02-2010, 12:28 AM
يا بنت وجه الخير بيّن و معروف
لو ما تكلم شافت الناس خيره


و الوجه الاقشر ماهو بحاجة اوصوف
يبــــــــــــــــــان حتى للعيون الضريره



من عاش يتبع خطوة المال ملهوف
رزقٍ كتبه الله .. مافيه غيره



الخوف لو ينفع .. نفع صاحب الخوف
اللي على حقه يدينه قصــــــــــــــــــيره



الضعف ماغيّر قدر ناسٍ ضعوف
عاشت صغيره ويوم ماتت صغيره



كلمة احبك بس من اربع حروف
وتحكي احاسيس ومشاعر كثيره



الحب اكبر من سهر ليل وطيوف
ماتفهمه حتى القلوب الكسيره



تدرين اصدق حب يطلع من الجوف
حب الفقير اللي عشق له فقيره



احلامهم تكبر من ملامس كفوف
وتكبر من اشواق العشير لعشيره



كنه معاها لو على ضلع مكشوف
داخل قصر يجمع امير واميره



احساسهم صادق بلا كذب وزيوف
كل ٍ يقول اللي يريّح ضميره



احساس طفله عندها العيد نفنوف
تظن من تلبسه صارت كبيره



وانا لحالي مجابه صفوف وصفوف
واليا خسرت اقول فدوه وخيره



اطيح و أوقف وابعد الشوف واطوف
اخذ قليل الزاد وارحل لديره



اترك كثير الزاد واكسب معروف
ترك الكثير يجملك في مصيره



يمكن يجيه انسان هالك من صدوف
يلقا من اللي تاركه مايجيره



شايف من الدنيا وعايف بشر عوف
اجناب والا من رجال العشيره



مرت علي اظروف واظروف واظروف
ماريحت حتى العيون السهيره



وللحين راسي راس وكتوفي كتوف
ماغيّرت مني ليالن عسيره



مدام فيني حيل وعيوني تشوف
والله معيّشني بحاله ستيره



والله لستقبل على بابي ضيوف
لو ما املك الا دلتين وحصيره ...




لثامر الدقباسي ,,


تحيآتي

اميرة السعادة
03-06-2010, 03:17 AM
يعطيك العافية
موضوع جميل وطرح مميز
اشكرك عل بوح قلمك الرائع
http://www.wlh-wlh.com/vb/imgcache/2/5321alsh3er.gif

أمير بكلمتي
03-06-2010, 01:22 PM
كلمات راقيه من قلم راقي

سلمت اناملك على هذا النثر الرائع كروعتك

ابدعتي واكثر

تقبلي مروري المتواضع

كل الاحترام والود

http://www.wlh-wlh.com/vb/imgcache/2/5330alsh3er.gif