المساعد الشخصي الرقمي

مشاهدة النسخة كاملة : يعني ايه دنيا !؟


رمز السلام
09-08-2007, 01:52 PM
حبة قسوة على حبة حنان على حبة فرح ، دمعة فرح على دموع احزان ، ليلة صبر وليالي احباط ، كلمة يارب لما تطلع من قلبك وتحسها بكل ما فيك ، أحلام بتتوه وسط احلام تانية وناس بتقتل فيك أحلى الحاجات وناس تانية بتصحيها وتحييها ..تتولد من جديد جوانا كل المعاني ، تسمع آية فتعيط وتسمعها في وقت تاني فتهرب ومتركزش فيها ، سجدة في قلب الليل وقلب بيبكي والحاح في استعجال رحمة ربنا ، ابتسامة ع الماشي تتبادلها مع طفل صغير وشه منور ، ست كبيرة قاعدة على رصيف تدعيلك دعوة متعرفش قد ايه انت محتاجها ، حد غلبان لاقاك جنبه وهو ميعرفكش وقدرت تعينه ومشيت وهو برضه ميعرفكش ، طرق سفر مليانة تفكير وتفكر وخوف وحسابات ودعاء لله ، تنام ومحدش يحس بيك وتبقى نفسك تصحى وانت نايم وتطبطب على نفسك وتنام تاني


ناس بتتولد فتشيلهم وكلك خوف عليهم م الأيام ، تقعد تنصحهم وتتمنالهم حاجات وتحبهم من أول حوار همه مش سامعينك فيه ، صلاة جنازة متحسش فيها بالدنيا وتبكي على نفسك اكتر من اللي مات ، تركز في وشوش الناس وحالهم بعد الجنازة ، تركز في تصرفاتك وحالك وقت الحزن وبعد ما يتنسي وتلف دايرة الحياة وتاخدك لشط تاني وتنسى تبص للي خايف منه ، اصحاب وخروج وكلام كتير هو هواه ومفيش جديد ، اصحاب جداد وكلام جديد وانت زي ما انت بتتعلم ومصمم متتوهش ، ولما تتوه …تخاف وترجع …وتتوه تاني وترجع مكسوف … تخطفك لحظات الحب من احزانك وتوديك بعيد لعالم جديد فيه قلوب الناس أحلى من وشوشهم وعيونهم كلها رحمة وكلامهم مليان صدق ، تحب الحياة للناس وتشغل نفسك بسعادتهم فتلاقيك مبسوط اوي وبعدت حزنك بعيد عنك من غير ما تحس ، تسمع للكل باهتمام وتحس انك اكتر حد لازم يبقى جنبهم حتى لو مش عارف

لحظات فقد وحرمان ..دموع مكتومة ودموع تانية تضحك بعد ما تفرغها ، وبعدين وليه وازاي واشمعنى ..بتقولهم كتير وانت مش واخد بالك ، درس ورا التاني واديك بتتعلم …حبك لكل مكان اتعلمت فيه حاجة وخوفك عليه من اي تعديل حتى لو للأحسن ، عايزه زي ما هو جواك ..ولاد وبيت وعيلة ودفا ورضا ولقمة حلوة ودعوة أم ، شوية هدوء على عصبية على اتزان على ترنح ، احتياجك عايزه بالشكل والصورة والطريقة اللي في دماغك والا بلاش وتبقى عيل صغير بيرمي اللعبة ويسيب صحابه ويقعد في ركن بعيد يعيط ولا حد يسأل فيه ويبقى نفسه يرجع بس مينفعش ، نزوات جميلة تتكسف تقول عليها كده ونزوات قبيحة تنساها من غير ما تحس ، كتاب ينوبك منه سطر يفضل معلق في دماغك وكتاب تنوبك منه صورة تفضل تفك في تفاصيلها لغاية ما تفهمها وبعد وقت طويل تلاقيك كنت فاهمها غلط ، بيت شعر مرسوم في عينك يجي ويروح وانت بتكلم نفسك او بتسمع غيرك ، كلمة بابا اول ما تتقالك وجريك على ولادك وهمه تعبانين ، وتتغير الحياة ومعاها تتغير كل حاجة الا ملامح قلبك ووشك ، تنسى وتفتكر وتضحك وتعيط وتفوق وتنام ،أكله تاكلها سد جوع واكله تانية تستطعمها وتنقح عليك اوجاع اللي مش لاقينها فتتوه نفسك وتشتت تفكيرك عشان مش وقته ، فكرة مجنونة في وقت مجنون تقوم وتعملها ، سراب تجري وراه كتير وانت عارف انه كده وبتضحك على نفسك ، عزوة اصحاب يغنوك شوية وتتفرقوا ، ناس تحبك ويبعدوا وناس تحبهم وتبعد ، لحظة صفا تطلع فيها للجنة وتعدي ع الأنبيا والصحابة وتقعد معاهم .. تتكسف فتنزل بسرعة ، لحظة خوف شايلك فيها اهلك وبينزلوك للقبر وكله يمشي وتعدي الايام ، شهادة نجاح تطير بيها وتجري وانت عايز تسلم على كل الناس وعايزهم يفرحوا زيك ، حضن الأم وبوسة على جبين ابوك وايديه


وتحقق شوية احلام وغيرها مظهرلكش شرها فمخفتش منها ولسه عايزها ، وعسى ان تكرهوا شيئاً وان شاء الله واللي يشوف بلوة غيره وادي حال الدنيا و بص للي اقل منك ومحدش واخد منها حاجة … كل ده كلام بتسمعه كتير ويعدي عليك من غير اقتناع ، وبعد ما العمر يعدي تقعد تقوله وتعيده وغيرك يسمعه ويعدي عليه ، تشطح بدماغك وياخدك غرورك وتنسى اصحاب الفضل ، وترجع ضعيف والدوا معاك منين ما تروح ، وتنتهي حياتك وميتبقاش منها الا شوية صور بتمر ادامك وحبة حزن على اخطاءك وطمع كبير في رحمة ربنا … وتقوم قيامتك


دي الدنيا زي مانا شايفها

القلب الطموح
02-03-2008, 09:20 AM
http://www.atyab.com/uploadscenter/uploads/bcb78a22db.jpg

رمز السلام
02-07-2008, 04:12 PM
شكرا لكي على المرور